സൂറത്തുല്‍ ബയ്യിനഃ : 01-08

‘ശുദ്ധമാക്കപ്പെട്ട ഏടുകള്‍’ കൊണ്ടുദ്ദേശ്യം ഖുര്‍ആനാകുന്നു. നബി(സ) തിരുമേനി എഴുത്തും വായനയും അറിയാത്ത ആളായത് കൊണ്ട് അവിടുന്ന് ഏട് നോക്കി വായിച്ച് കൊടുക്കാറില്ല. അപ്പപ്പോള്‍ വരുന്ന വഹ്‌യ് അപ്പപ്പോള്‍ തിരുമേനി ഹൃദിസ്ഥമാക്കുകയും അത് ജനങ്ങക്ക് ഓതികേള്‍പ്പിക്കുകയും ചെയ്യും. അതോട് കൂടി അവ അതതവസരങ്ങളില്‍ തന്നെ എഴുത്തുകാര്‍ മുഖേന ഏടുകളില്‍ എഴുതി സൂക്ഷിക്കലും പതിവായിരുന്നു. ഇത് കൊണ്ടാണ്  ‘ഏടുകള്‍ ഓതിക്കൊടുക്കുന്നു’ എന്ന് പറഞ്ഞത്. അവയില്‍ അടങ്ങിയ നിയമങ്ങളും, തത്വോപദേശങ്ങളുമാണ് ‘ചൊവ്വായ ലിഖിതരേഖകള്‍’ കൊണ്ടുദ്ദേശ്യം.

ഈ ആയത്തുകളുടെ സാരം ചുരുക്കത്തില്‍ ഇപ്രകാരമാകുന്നു: യാതൊരു തരത്തിലുള്ള വക്രതയോ കോട്ടമോ ഇല്ലാത്തതും, ശരിക്ക് ചൊവ്വിനുള്ളതുമായ നിയമങ്ങളും തത്വങ്ങളും ഉള്‍ക്കൊള്ളുന്ന പരിശുദ്ധമായ ചില ഏടുകളിലായി രേഖപ്പെടുത്തി സൂക്ഷിക്കപ്പെട്ടിട്ടുള്ള ഖുര്‍ആന്‍ വചനങ്ങള്‍ ഓതികേള്‍പ്പിക്കുന്ന ഒരു റസൂല്‍ – അഥവാ നബി (സ)തിരുമേനി – സുവ്യക്തമായ തെളിവുകള്‍ സഹിതം വന്നെത്തുന്നത് വരെയും വേദക്കാരും മുശ്‌രിക്കുകളുമാകുന്ന അവിശ്വാസികള്‍ അവരുടെ ദുര്‍മാര്‍ഗ്ഗത്തില്‍ ചിരകാലമായി ഉറച്ച് നിന്ന് വരികയായിരുന്നു. റസൂല്‍ വന്ന് ഖുര്‍ആന്‍ ഓതി കേള്‍പ്പിക്കാന്‍ തുടങ്ങിയപ്പോഴാണ് അതില്‍ നിന്ന് ചിലര്‍ വേറിട്ട്പോന്ന് രക്ഷപ്പെടുവാന്‍ തുടങ്ങിയത്. മറ്റുള്ളവരാകട്ടെ, ഭിന്നിപ്പിലും നിഷേധത്തിലും മുഴുകുകയും ചെയ്തു. അല്ലാഹു തുടര്‍ന്നു പറയുന്നു:-

മുശ്‌രിക്കുകളെ സംബന്ധിച്ചിടത്തോളം മുമ്പ് അവര്‍ക്ക് വേദഗ്രന്ഥങ്ങളെപറ്റി പരിചയമില്ലാത്തവരാകകൊണ്ട് അവര്‍ നബി(സ)യെയും ഖുര്‍ആനെയും നിഷേധിച്ചതില്‍ വലിയ അത്ഭുതമില്ല. എന്നാല്‍ വേദക്കാരുടെ നില അതല്ല. അവര്‍ വേദഗ്രന്ഥങ്ങളുമായി പരിചയമുള്ളവരാണ്.അവയുടെ അദ്ധ്യാപനങ്ങളില്‍ നിന്ന് അവര്‍ പിഴച്ച് ദുര്‍മാര്‍ഗത്തില്‍ പതിച്ച് കൊണ്ടിരിക്കെയാണ് വ്യക്തമായ തെളിവുകളും കൊണ്ട് റസൂലും ഖുര്‍ആനും അവര്‍ക്ക് വരുന്നത്. അതേ സമയത്ത് അറേബ്യയില്‍ വെളിപ്പെടുവാനിരിക്കുന്ന ഒരു റസൂലിന്‍റെ വരവ് അവര്‍ ചിരകാലമായി കാത്തുകൊണ്ടിരിക്കുകയുമാണ്. അവരുടെ കൈവശമുള്ള വേദഗ്രന്ഥവും ഇപ്പോള്‍ റസൂല്‍ കൊണ്ടുവന്ന വേദഗ്രന്ഥവും തമ്മില്‍ വല്ല പൊരുത്തക്കേടുമുണ്ടോ? അതുമില്ല.ശിര്‍ക്കിന്‍റെ കലര്‍പ്പില്ലാത്ത നിഷ്‌കളങ്കമായ തൗഹീദ്, നമസ്‌കാരം, സകാത്ത് മുതലായ കാര്യങ്ങളായിരുന്നു മുന്‍ ഗ്രന്ഥങ്ങള്‍ അവരോട് ശാസിച്ചിരുന്നത്. അത് തന്നെയാണ് ഖുര്‍ആനും ശാസിക്കുന്നത്. എന്നിട്ട് പോലും വേദക്കാര്‍ ഖുര്‍ആനിലും റസൂലിലും വിശ്വസിക്കുവാന്‍ തയ്യാറായില്ല. മാത്രമല്ല, അസൂയയും പകയും വെച്ച് കൊണ്ട് തങ്ങളുടെ വേദഗ്രന്ഥത്തിന്‍റെ ശാസനകള്‍ക്കും, വര്‍ഗ പിതാവായ ഇബ്രാഹീം(അ) നബിയുടെ പാരമ്പര്യ നടപടികള്‍ക്കും വിരുദ്ധമായി ഇസ്‌ലാമിന്‍റെ ശത്രുക്കളായി ഭിന്നിക്കുകയാണ് അവര്‍ ചെയ്തത്.

എല്ലാ ദുര്‍മാര്‍ഗങ്ങളും വിട്ട് ഋജുവായ സത്യമാര്‍ഗത്തിലേക്ക് തിരിഞ്ഞവര്‍ എന്നാണ് حُنَفَاءَ(ഹുനഫാഉ്) എന്ന വാക്കുകൊണ്ടു വിവക്ഷ. ഇബ്രാഹിം (അ) നബിയുടെ മതപാരമ്പര്യം സ്വീകരിച്ചവരുടെ വിശേഷണമായും ആ വാക്ക് ഉപയോഗിക്കപ്പെടാറുണ്ട്. വേദക്കാര്‍ തങ്ങളെപ്പററി തങ്ങള്‍ ‘ഹുനഫാഉ്’ ആണെന്ന് അവകാശപ്പെട്ടിരുന്നു. അപ്പോള്‍, അതേ, പാരമ്പര്യം നിലനിര്‍ത്തിക്കൊണ്ടിരിക്കുന്ന ഖുര്‍ആനെയും റസൂലിനെയും അവര്‍ നിഷേധിക്കുന്നതിന് യാതൊരു ന്യായീകരണവും ഇല്ലാത്തതാണ്. വേദക്കാരായിരുന്നാലും മുശ്രിക്കുകളായിരുന്നാലും ശരി, നിഷേധത്തിന്‍റെ ഫലം നരകം തന്നെ. അല്ലാഹു പറയുന്നു:

അല്ലാഹുവിന്‍റെ തൃപ്തി ലഭിക്കുകയും അവനെ പറ്റി തൃപ്തിവരുകയും ചെയ്യുന്ന സജ്ജനങ്ങളില്‍ അല്ലാഹു നമ്മെ ഉള്‍പ്പെടുത്തട്ടെ. ആമീന്‍